Eidsborg stavkyrkje

Om

La omvisaren ta deg med på ei reise gjennom 800 år. Høyr om historia til stavkyrkjene og korleis kyrkja i Eidsborg har endra seg frå 1100-talet og frametter i takt med tru og skikk. Her får du mellom anna soga om helgenfiguren Nikuls.

Stavkyrkjene blir rekna som Noregs bidrag til verdsarkitekturen. I mellomalderen fanst det truleg fleire enn 1500 stavkyrkjer. Ein gjekk lenge utifrå at Eidsborg stavkyrkje blei bygd mellom 1250 og 1270. I 2023 blei det innhenta nye boreprøver og fotoprøver av bygningsdelar i stavkyrkja. Rapporten basert på prøveresultata kom hausten 2024, og konklusjonen der er at kyrkja i Eidsborg kan vere reist rett før 1150, altså 100 år tidlegare enn me har trudd! Det plasserer Eidsborg stavkyrkje blant dei fem eldste stavkyrkjene i landet.

Ta ein tur innom stavkyrkja på ein 360 graders visning

Eidsborg stavkyrkje er ei av dei best bevarte av landets 28 stavkyrkjer frå mellomalderen. Det er den andre kyrkja i Eidsborg, og ho erstatta ei stolpekyrkje som stod på same staden. I kyrkja finn du helgenbiletet av St. Nikolaus, eller Nikuls som bygdefolket kalla han. Rundt denne vaks det fram ein særskild kultus med særtrekk du berre finn her.

Gjennom kyrkjelege påbod og reformar, endra eigarskap, skiftingar i tru, mote og plassbehov har kyrkja blitt endra opp gjennom hundreåra. Stavkyrkja var i 2010 ferdig restaurert etter tre års arbeid. Eit treårig prosjekt som innebar nye rundar med tjærebreiing vart avslutta våren 2020.

I 2008 blei det lansert ei historiebok om Eidsborg stavkyrkje, skrive av religionshistorikar Øystein Morten. Boka er å få kjøpt i museumsbutikken til Vest-Telemark museum.

Kyrkja er ei levande soknekyrkje med gudstenester og brurevigslar i perioden mai til september. Sjå heimesida til kyrkja i Tokke for meir informasjon: www.kyrkja.tokke.no 　

I sesong er det omvising til faste tider tre gonger om dagen, i opningstida til Vest-Telemark museum Eidsborg, såframt det ikkje kolliderar med den kyrkjelege verksemda.

Utanom opningstider kan ein bestille omvising for grupper heile året, så sant vér og føre tillet det.