Jenta ved Red River

Om

Den norsk-amerikanske kunstnaren Orabel Thortvet (1896-1983) var barnebarn av Olav Geitestad/Thortvedt/Tortveit som emigrerte med nesten heile familien frå Fyresdal til Houston County i USA i 1860. 10 år seinare, i 1870, reiste familien vidare til «opent» land i Nord-Minnesota, der det framleis var mogleg å busette seg der man ville. Kring garden deira oppstod «Buffalo River Settlement», ei av dei sentrale norske busettingane i Midtvesten som Torkel Oftelie skriv om alt i første utgåve av «Telesoga» i 1909. Orabel var oppteken av denne migrasjonshistoria gjennom heile livet og skildra den i mange forteljingar, teikningar, måleri og meir enn 60 såkalla «scrap books».

Vest-Telemark Museum har i 2019 samarbeid med HCSCC (Cultural Society of Clay County i Moorhead, Minnesota, USA) laga utstilling og bok om Orabel sin kunst, og om utvandringshistoria til Thortvedt-familien. Utstillinga «Red River Girl» var å sjå i Eidsborg både i 2020 og 2021, og boka – som er tospråkleg – er i ferd med å bli utseld både i Noreg og USA. Prosjektet blei støtta av Telemark Fylkeskommune, Fyresdal kommune og Fritt Ord.

Tilstellinga er den offisielle avsluttinga for prosjektet. Me får besøk av to amerikanske historikarar, Mark Peihl og Jim Skree, som har bidrege mykje til utstillinga og boka.

Program:
Velkomen v/ Tilman Hartenstein, formidlingsansvarleg VTM
Jim Skree, lokalhistorikar med slektsband til m.a. Vrådal og Fyresdal: «Ole Comes to Houston» – om den tidlege utvandringa frå Vest-Telemark til Houston, Minnesota
Mark Peihl, arkivar ved HCSCC og ansvarleg for Thortvedt-samlinga: «Orabel Thortvedt, Her Family and Their Legacy» – om Buffalo River Settlement og Orabel Thortvedt sin familiehistorie
Høve til spørsmål til føredragshaldarane

Store delar av tilstellinga vil gå føre seg på engelsk.

Etter tilstellinga er det mogleg å ete middag i kafeen, før konserten "Slåttebass og munnharpeføss" med Mattis Kleppen og Thov Wetterhus startar kl. 16.30.

Gratis inngang til føredragene!