Bjordal

Om

Øverst i Hjartdalsheiane driv Olav S. Nordbø stulen Bjordal saman med kona Lorima og døtrene April, Åse Marit og Miriam om sommaren. Stulen ligg på omlag 700 meter over havet i eit gamalt beite- og staulsområde. Kyrne flyttar opp på sommarbeite rundt Jonsok (midtsommar) og er der til omtrent midten av august. Fridomen på fjellet gjer at dyra bygger opp musklatur og får nye krefter. Fjellgraset er friskt og næringsrikt og gjer at kyrne trivst og mjølkar ekstra godt. Av mjølka blir det laga fjellost, smør, rjome, knaost og prim på den tradisjonelle måten.

Frå gamalt av er gjestfridom ein dyd, og du er velkomen til å besøke stulen Bjordal som høyrer til garden Nordbø i Hjartdal. Her kan du kjøpe kaffe, saft og vaflar. Rjomegraut på bestilling. Kontant betaling. Kombiner gjerne med ein fjelltur, då smakar det ekstra godt. Du kjem inn i eit gamalt
gjetarområde og kan sjå for deg korleis folk gjennom lange tider passa på husdyra sine slik at dei heldt seg innafor beiteområdet. Det var også viktig å verne dei mot rovdyr og sjå etter at dei var friske.

Området er ei staulsgrend med seks vårstaular som alle var i drift før i tida. Når buskapen skulle heim om hausten bytta dei seks staulane år for år på å samle buskapen på ein av staulane før dei dreiv dei ned til bygda. Denne siste turen blei kalla for «hevdetur», som betyr «gjødsletur». Hevdeturen var ei viktig ordning for å få god grasavling og med dette kyr som mjølka godt og la på seg om sommaren.Avføringa etter buskapen er verdifull gjødsel som tilfører jorda næring.