Kraft i vatn

Om

Oppdemming av innsjøar, vasskraftutbygging og transport av straum er blitt ein del av Noregs industrihistorie. Det er gjort store inngrep som har endra landskapet mange plassar. Fossar er lagt i rør, dalar overfløymt.

Store kraftverksbygg er reist, mange i storslegen arkitektur slik at dei står fram som vasskraftens katedralar. Kraftgater er slege gjennom skogen, digre «englemaster» sett opp. Kraftutbygginga i Noreg er ei suksesshistorie som pregar mange kommunar rundt om, og er i ferd med å bli historisk.

Kuråsfossen kraftverk på Røros, bygd i 1896, blei i 2010 del av UNESCOs verdsarv. Utbygginga av den verdskjende Rjukan-fossen i 1905 er også i ferd med å bli verdsarv, saman med bl.a. Tinfos på Notodden.

I ei stor plakatutstilling i Eidsborg frå mars til mai 2015 viste Vest-Telemark Museum kraftutbygginga sine talrike kulturminne rundt om i landet. Gjennom fleire prosjekt på 2000-talet er desse kulturminna blitt registrert, fotografert og samla i bokform.

Utstillinga er basert på dette arbeidet. Ho er laga av Norges Vassdrags- og Energidirektorat (NVE) i samarbeid med Norges Vasskraft- og Industristadmuseum (NVIM) og Norsk Skogmuseum.

Sundag 3. mai kl 16 var det ei tilstelling ved museet der Per Einar Faugli frå Nve fortalde om kraftrelaterte kulturminne i Vest-Telemark.