Soga om skisportens vogge - 30 år etter OL på Lillehammer

Om

I 2024-2025 viser Norsk Skieventyr i Morgedal utstillinga Soga om skisportens vugge - 30 år etter OL på Lillehammer.

I 1884 utvandra Sondre Norheim frå Morgedal til Nord-Dakota i USA.

Då hadde han vist fram bygdeleiken frå Morgedal – skigåing og hopp i laussno og ulendt terreng – i Kristiania (Oslo) fleire gonger sidan 1868.

I 1883 blei «Foreningen for Ski-idrettens fremme» grunnlagt, som ei direkte følgje av dei populære skirenna i hovudstaden. Foreininga standardiserte bygdeleiken og utvikla den til regulær konkurranseidrett utover 1880-talet.

Skikulturen og konkurransane i «Telemarkstil» blei del av nasjonsbyggingsprosjektet kring sjølvstendet i 1905. Sondre blei av patriotiske aktørar gjort til eit symbol for den norske skikulturen – saman med bygda Morgedal og landsdelen Telemark.

I utstillinga presenterast fleire av desse aktørane, og historia om korleis ideen om ein fakkelstafett frå Morgedal til vinter-OL blei lansert. Etableringa av Norsk Skieventyr A/S i forkant av Lillehammer-OL var ein direkte følgje av dette initiativet.

I utstillinga visast delar av den store samlinga av ski-pins som skihistorikar Jakob Vaage har gjeve til Skieventyret. 

Norsk Skieventyr har ope 10-17 alle dagar mellom 1. mai og 15. september. Me tek i mot gruppebestillingar heile året.